Harççılarlan işiniz olmasın

налог“Allah korusun beladan-hatadan”, – bölä deyärmiş evelkilär. Ama şindi buna lääzım eklemää “… hem harç inspekţiyasından” parçasını da. Varsa borcun harççılara – etişiptä alaceklar alacaanı, ama onnarın sana varsa verecää – genä etişeceklär, neredä dä olsan.

Bu istoriya çeketti taa bir buçuk yıl geeri. Eni yıla karşı biz kablettik ilk “mutluluk kiyadı”. Gözäl resimni bir konverttä – o bana yollanmıştı – vardı sade bir yaprak, angısında yazılıydı, ani en kısa zamanda bän gideyim Çadır harç inspekţiyasına. Gelir dokumentlerindä varmış yannışlık, da bana yazmışlar ştraf. Eni yıla karşı cezalı olmak beni pek sevindirmedi, dooru söleyim. Dedim, yortular geçsin, da ödeşecäm bän bu dertlilärlän. Dedim da yanıldım.

– Sizin deklaraţiyanız verilmemiş, – dedi Çadırda bana yalpak sesli bir genç karı. – Bundan kaarä, sizin başka erdän dä olmuş geliriniz, bunnarı topladıynan, çıkêr, ani sizdän az vergi tutulmuş. Cezanız 1348 ley, gidin da ödäyin bankta.

Annaşıldı. Zor hiç bişey yok, ki annaşılmasın, diil mi? Diilmiş.

Yarım yıl geçti-geçmedi, taa bir kiyat getirer poştarka. Genä çaarêrlar Çadıra harç inspekţiyasına, ama bu sefer karımı. Şindi dä onun dokumentlerindä varmış dolaşıklık. Ama o küçük uşaklan evdä, onun erinä giderim bän harççılara.

– Zaman hayır olsun, harççı beylär! – Taa girärkän, dedim kapudan. – E, fariseylär neredä e? – Bu şakayı da yaptım, ama hiç kimsey bunu annamadı.

– Bu odada ölä kişi yok, – dedi yaşlıca bir adam, o oturardı o yalpak sesli karının yanında. – Burada harç inspektorları sadem.

налог2Yaklaştım o karıya, adı Natalyaymış. Söledim, ani onnar çaardılar bizimkisini, ama o küçük uşaklan, da onun erinä bän geldim. İ, islää. Enidän doldurduk onun deklaraţiyasını da, ona da var çevirsinnär para. Bıldır, açan duumuş üçüncü uşak, onun varmış hakı taa zeedi gelirindän vergi ödämemää, ama o para tutulmuş ozaman, da şindi geeri çevireceklär.

– Ama siz yok nicä onun erinä alasınız o parayı, – Natalya. – O lääzım kendisi gelsin, getirsin iştän bir gelirlerini gösterän dokumenti, bir – primariyadan, ani yok borcu, banktan rekvizitlerini hem uşaak mitrikasının kopiyasını.

Bän başladım sevinmää: bizä dä devlet geeri nesä çevirecek. 682 ley. Genä para.

Bir haftadan sora bizim karı gider Çadıra. Hepsini dokumentlerini toplamış, vermiş. Bir ay bekläyin, demişlär, para gelecek.

Bir ay geçmedi, bizim poçta kutumuzda eni bir konvert harççılardan. Açarkan, bän hep şüpeliyim, acaba bana da mı geeri çevireceklär. Şindi. Diil ani bana çevirsinnär, ama karıya da vermeyeceklär. Onnar şindi görmüşlär, ani bana bıldır vermişlär premiya üç bin ley, da bizim ikimizin toplama gelirimiz olmuş kırk bin leydän zeedä. Kırk bindän zeedäysä, üçüncü uşak için harç kolaylıı verilmärmiş. Üstelik – o üç bin leydän dä vergi tutulmamış, onun için bana genä ştraf yazmışlar edi proţent – 210 ley hem dä penä 17 ley, hepsi 227 ley.

Giderim bän genä Çadıra. Artık o harççıların kontorasında beni hepsi tanıyêr, kapu yanında yatan boz motan da. Giderim uz Nataşaya, sıra da beklämeerim. Bu nesoy ţirk olêr, her ay Çadıra kataylanmaa. Odada Natalya yok, izindäymiş. O yaşlıca adam yanında oturan bir kıza yadırdı kvitanţiyayı, gittim bankta ödemää.

Taman girdim odalarına, üfkeliyim nicä kuduz sivri sinek. O yaşlıca adam deer:

– Kusura bakmayın, bileriz, ani çok kaçınêrsınız. Ama siz diilmiş lääzım ödeyäsiniz bu parayı. 2015 yıl için sizä dä var geeri çevirmää 682 ley. Oradan kapadılêr bu 277 ley, da sizä kalêr kabletmää 405 ley. – Bän kızarêrım patlacan gibi, üfkedän bişey söleyämeerim, may bir saat sıra bekledim bankta ödemää bu pıstiya parayı. – Vika, kaçarak gidin banka, da o 277 leyi adama geeri versinnär.

Vika haşlanmış gibi fırlêêr odadan, bän dä onun ardına. Bankta önderci sistemalarında siler o ödemeyi, da bana çevirerlär 277 leyi. Kalêr kabletmää 405 ley, ama benim yanımda yok ne iştän gelir informaţiyası, ne primariyadan o dokument, ani küüdä yok borcum.

Ertesi hafta, toplayıp bu dokumentleri, bän genä giderim Çadıra. Nataşa izindän çıkmış, alêr dokumentlerimi.

– E sizin evlilik dokumenti nerdä e? – sor bu bana.

– Taa bir kerä getirdärseniz beni Çadıra, bir bombaylan gelecäm, – deerim. Üzümdä bir sinir titirämeer. Nataşa bilämeer, gülsün mü, korksun mu. Yaşlıca adam, kafasını kaldırmadaan, başladı gülmää. Sora başını bana kaldırdı, sustu. – Gideriz direktorunuza.

Direktor savaşêr beni uslandırmaa, Natalya bir tarafta aalêêr. İlk kerä bän ölä kendimdän çıktım, hiç kendimi aklımda tutmêêrım. Bu nesoy iş. Dolaya gülüntü olduk, iştä artık bana bankir deerlär. Hafta geçmeer, bän iştän kalêrım pıstiya harççılar için. Ettiysä etti.

Hiç tutmêêrım aklımda, nasıl çıktım o harç inspekţiyasından, geldim evä.

– Şindän sora gitmeeriz Çadıra, – dedim karıya. – Yazsınnar istärselär bin kiyat.

Birkaç gündän sora genä geler onnardan bir kiyat: gelin paranızı almaa, zerä yıl biter, sora esaplar bir aydan zeedä kapalı olacek. Kiyadı konvertinnän bilä – fırına. Bu Eni yılımızı da savaşêrlar bozmaa. Olmayacek.

Eni yıl yortuları geçti, her hafta birär kiyat başladı gelmää harççılardan. Birindä kutlêêrlar bizi yortularlan, öbüründä teklif ederlär gelelim, üçüncüdä yalvarêrlar artık. Hepsi fırına. İlkyaza dooru başladılar gelmää üfkeli kiyatlar: gelmäzseniz, daava açacez sizä. Bän, harççılarlan işim olmasın deyni, işi dä braktım, oturêrım evdä. Karım da işlämeer, uşaklan evdä. Öbür uşaklar da küçük, işlämeerlär birerdä, şükür.

Geçennerdä bir kiyat genä geldi. Baktım, konverti taa büük, daavaya çaarêrlar Çadıra. Harç inspekţiyası vermiş bizi daavaya, ani istämeeriz 405 leyi kabletmää. O kiyadı da fırına, makarki yaz. Beni Çadıra sade konvoylan çıkaraceklar şansora.

Реклама

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s

%d такие блоггеры, как: